Dağlara söykənən şair - AĞASƏFA

Bakıdan çox da uzaqda olmayan dağlar qoynunda yerləşən Xızı rayonunun Qarabulaq kəndində şair, tərcüməçi, publisist, dəyərli redaktor Ağasəfa yaşayır.
75 yaşı tamam olsa da, bu gün də bədii yaradıcılıqla və müəllimliklə məşğul olan Ağasəfanın şeir dünyasının məziyyətləri dağlara söykənir. Onu görəndə insan qəlbində təmizlik, saflıq, bitib-tükənməyən əzəmət duyulur. Bəlkə elə bu cəhətlərdir ki, Ağasəfanı müdrik yaşa gətirib çıxarıb.
75 il əvvəl indi yaşadığı ata-baba ocağında dünyaya göz açan Ağasəfanın ilk şeiri 60 il bundan qabaq yəni, 1957-ci ildə "Sosialist Sumqayıtı" qəzetində işıq üzü görəndə onun cəmi 15 yaşı var idi.
Bu illər ərzində Ağasəfa özünü şair, Azərbaycan poeziyasının istedadlı nümayəndəsi kimi təsdiq etdi. Şairliyə ağır zəhmətdən başlayan Ağasəfa 1963-1971-ci illərdə Bakı Paravoz Deposunda fəhlə, geoloji kəşfiyyat idarəsində qazmaçı köməkçisi kimi fəaliyyət göstərsə də qələmini şeir yazmaqla davam etdirmişdir. Onun istedadını görən unudulmaz dramaturqumuz Seyfəddin Dağlı 23 yaşlı Ağasəfanı baş redaktoru olduğu "Kirpi" jurnalında işə dəvət edir. On bir il ərzində Ağasəfanın yazdığı satirik məqalələr onun jurnalistlik keyfiyyətlərini ortaya qoyur. Həmin mətbu orqanda o dövrün dəyərli qələm sahiblərindən Ağasəfa incə yumor bacarığını insanın daxili aləmində yerləşən "mən"ini bir yerə toplaya bilir. "Kirpi" jurnalında səmərəli fəaliyyəti ilə yanaşı Ağasəfanın redaktorluq imkanları üzə çıxır. Bu baxımdan "Azərbaycan qadını" jurnalında çalışdığı illərdə artıq püxtələşmiş qələmi ona imkan verir ki, Ağasəfa yazdığı və redaktə etdiyi məqalələrdə sözünü deyə bilsin. Ağasəfanın yaradıcılığı o vaxtlar fəaliyyət göstərən "Yazıçı" nəşriyyatında bədii tərcümə redaksiyasının böyük redaktoru olduğu zamanlarda başlıca təzahürünü tapır. Bundan başqa Ağasəfa "Karvan" kitablar seriyası redaksiyasında böyük redaktor, "Novruz" qəzetində məsul katib, "Ədəbiyyat" qəzetinin məsul katibinin köməkçisi vəzifələrində işləmişdir. O həm də "Ozan ocağı" şirkətinin baş redaktoru olmuşdur. Ağasəfa eyni zamanda tərcüməçi kimi böyük şövqlə dilimizə çevirmələr etmişdir. 60 illik yaradıcılığı ərzində onun çap etdirdiyi kitablarının hamısı Ağasəfa üçün doğmadır, əzizdir. Bu kitabların adlarını gözdən keçirəndə oxucu sanki Ağasəfanın tərcümeyi-halını dərindən hiss edir. 25 ildən çoxdur ki, Ağasəfa Qarabulaq kəndində şeirlə, sözlə, müəllimliklə ömrünün müdriklik, ağsaqqallıq dövrünü üst-üstə qoyur. 75 yaşınız mübarək olsun, Ağasəfa müəllim.

P.S.: "Ədalət" qəzetinin və elm.info.az saytının kollektivi də şairi 75 yaşı münasibətilə təbrik edir, ona can sağlığı və yaradıcılıq uğurları arzu edir.


Müşfiq Cabiroğlu,
Elşad Dağlı

elm.info.az


.