Müəllim kimdir və necə olmalıdır?

Müəllimlik – şərəfli, məsuliyyətli və vicdan tələb edən bir peşədir.

Müəllimlik sadəcə bir peşə deyil, bir həyat tərzidir. Bu peşəni seçən hər kəs bilməlidir ki, o, sadəcə dərs demir – o, gələcəyin insanını formalaşdırır, bir millətin gələcəyinə yön verir. Ona görə də müəllim olmaq vicdan məsələsidir. Əsl müəllim olmaq isə ürəkdən gələn bir çağırışdır.

Müəllim kimdir? O, təkcə bilik verən deyil – o, həm də yol göstərən, dəyərləri aşılayan, həyatın özünü öyrədən şəxsdir. Onun sözləri şagirdin zehnində, davranışı isə qəlbində iz buraxır. O, şagirdlərinin həyatında bir mayak kimi yanar, onlara istiqamət göstərər.

Müəllim necə olmalıdır? İlk növbədə vicdanlı və ədalətli olmalıdır. Şagirdlər arasında fərq qoymadan, hər birinə eyni məsuliyyətlə yanaşmalıdır. Onun baxışı təkcə sinif otağına deyil, həm də şagirdin iç dünyasına yönəlməlidir. Onun qayğısı bir övladın qayğısı qədər səmimi, diqqəti bir ata və ya ana nəvazişi qədər isti olmalıdır.
Müəllim həm də əqidəli olmalıdır. Cəmiyyətin dəyişən mənzərəsində o, öz mənəvi mövqeyini qorumalı, şagirdlərə doğru və dürüst olmağı öyrətməlidir. Müəllim tələbkar olmalıdır, lakin bu tələbkarlıq sərtliklə deyil, qayğı ilə yoğrulmalıdır. Tələb etməli, lakin incitməməlidir.
Ən əsası, əsl müəllim öz üzərində daim işləyən şəxsdir. Zaman dəyişir, texnologiya inkişaf edir, təhsil sistemi yenilənir. Müəllim isə bu dəyişikliklərə uyğunlaşmalı, daim öyrənməyə açıq olmalıdır. Çünki öyrənmədən öyrətmək mümkün deyil.

Bu fikirlərin işığında, mən – Mehman müəllim – özüm də bu peşəyə könüldən bağlanmışam. Qarabağ müharibəsi veteranı olaraq Vətənə borcumu səngərdə verdikdən sonra, ikinci səngərim məktəb sinifləri oldu. Fiziki tərbiyə müəllimi kimi yalnız bədən deyil, iradə və mənəviyyat da formalaşdırmağa çalışmışam. Mənim üçün hər bir şagird fərqli bir dünyadır. Onların həyatına müsbət iz qoymaq, düzgün yolla yönəltmək mənim üçün ən böyük vəzifədir.

Mən Qarıqışlaq adlı gözəl bir kənddə doğulub boya-başa çatmışam. O kəndin dağlarının, çaylarının, qartalların ruhunu içimdə daşıyıram. Həyat mənə həm müharibənin acısını,həm köçkünlük həyatını,həm müharibənin qalibiyyətin həm də sinif otağının sevinclərini yaşadıb. Bu gün də müəllim adını böyük bir şərəf və məsuliyyət kimi daşıyıram. Şagirdlərim ölkənin hər yerində çalışır, uğurlar qazanır, bu isə mənim üçün əvəzsiz bir mükafatdır.
Bəli, mən fəxrlə deyirəm: Mən müəlliməm! Mən insan yetişdirirəm! Bu adla yaşayıram və yaşamağa davam edəcəyəm.

Mehman Səfərli,
Bakı şəhəri, Sabunçu rayonu,
Cəlal Məmmədyarov adına
155 nömrəli tam orta məktəbin
fiziki tərbiyə müəllimi

ZiM.Az


.