AzMİU-nun 50 illik yubileyi münasibətilə TƏBRİK MƏKTUBU

AZƏRBAYCAN MEMARLIQ VƏ İNŞAAT UNİVERSİTETİNİN REKTORU,
AZƏRBAYCAN RESPUBLİKASININ ƏMƏKDAR MEMARI, MEMARLIQ DOKTORU,
PROFESSOR GÜLÇÖHRƏ MƏMMƏDOVAYA

Azərbaycan Memarlıq və İnşaat Universitetinin (AzMİU) 50 illik yubileyi münasibətilə

TƏBRİK MƏKTUBU

Hörmətli Gülçöhrə xanım!

Sizi - Azərbaycan Memarlıq və İnşaat Universitetinin rəhbərliyini, professor-müəllim heyətini, bütün əməkdaşlarını və tələbələrini Azərbaycan Memarlıq və İnşaat Universitetinin 50 illik yubileyi münasibətilə ürəkdən təbrik edirəm.

Yarım əsrlik fəaliyyəti ərzində universitet ölkəmizdə memarlıq, inşaat mühəndisliyi, şəhərsalma və digər mühüm sahələr üzrə yüksək ixtisaslı kadrların hazırlanmasında misilsiz xidmətlər göstərmiş, elmi tədqiqatların inkişafına və infrastruktur quruculuğuna verdiyi töhfələrlə özünəməxsus mövqe qazanmışdır. AzMİU-nun formalaşdırdığı mütəxəssislər həm Azərbaycanda, həm də ölkəmizdən kənarda mühüm layihələrdə iştirak edərək universitetin adını layiqincə ucaltmışlar.

Qeyd edim ki, mən özüm də Azərbaycan Memarlıq və İnşaat Universitetinin məzunuyam. Ömür-gün yoldaşım tanınmış alim, vətənpərvər ziyalı, üzvi yarımkeçiricilər və ifrat-keçiricilik fizikası sahəsinə aid 200-dən çox elmi əsərin müəllifi olmuş fizika-riyaziyyat elmləri doktoru, mərhum professor Vidadi Yusif oрlu Əliyev 1969-cu ildən Azərbaycan İnşaat Mühəndisləri İnstitutunda (indiki AMİU) işləmiş, 1996 ildən AMİU-nun yüksək-temperaturlu ifratkeçiricilər elmi tədqiqat laboratoriyasının rəhbəri olmuşdur. Təəssüflər olsun ki, o bu günü görmədi. Beynəlxalq elmi konfransda çıxış etmək məqsədilə Türkiyəyə getmiş professor Vidadi Əliyev Şuşanın işğalı xəbərini eşitdikdə dözə bilməmiş, iflic olmuş və dünyasını dəyişmişdir.

Nə yaxşı ki, Ali Baş komandanımız İlham Əliyevin müdrikliyi, Müzəffər Ordumuzun şücaəti, xalqımızın bütövlüyü və qəhrəmanlığı sayəsində Şuşa və bütün Qarabağ azad olmuş, ölkəmizin bütövlüyü və suverenliyi bərpa olunmuş, Universitetin professor-müəllim heyətinin fədakar əməyi, tələbələrin yaradıcılıq ruhu və rəhbərliyin uzaqgörən idarəçiliyi sayəsində AzMİU bu gün ölkənin aparıcı ali təhsil müəssisələrindən biri kimi inkişafını davam etdirir. Sözsüz ki, indi Vidadi müəllimin də ruhu şaddır.

Bu əlamətdar yubiley münasibətilə Sizə möhkəm can sağlığı, elmi-pedoqoji fəaliyyətinizdə yeni nailiyyətlər, universitetin qarşıdakı illərdə daha böyük uğurlar qazanmasını diləyirəm. Ümid edirəm ki, AzMİU bundan sonra da memarlıq və inşaat sahəsində müasir çağırışlara cavab verən, yenilikçi və yaradıcı mütəxəssislərin yetişdirilməsində mühüm rol oynamaqda davam edəcəkdir.

Bir daha Sizi öz adımdan, ailəmiz adından və Redaksiya Heyətimiz adından 50 illik yubiley münasibətilə ürəkdən və səmimi-qəlbdən təbrik edir, hər birinizə yeni-yeni uğurlar arzulayıram.


Hörmətlə,
SÜSƏN ƏLİYEVA,
Azərbaycan Memarlıq və İnşaat Universitetinin məzunu,
Azərbaycan Jurnalistlər Birliyinin üzvü,
“Abdulla Şaiq”, “Qızıl Qələm”, “Zirvə”,
“Zəfər”, “Xan qızı Natəvan” və s.
mükafatların laureatı,
“XXI Əsrin Ziyalısı” Fəxri Diplomçusu,
“Borçalı” nəşriyyatının və
“Borçalı” qəzetinin redaktoru,
“Zirvə” İnformasiya Mərkəzinin
Baş məsləhətçisi,
“Yurd” İnformasiya Mərkəzinin
və “Şərqin səsi” qəzetinin
Redaksiya Heyətinin üzvü,
4 kitab müəllifi.


ZiM.Az


.