ŞƏRƏFLİ ƏMƏYİN LAYİQLİ QİYMƏTİ

TƏBRİK EDİRİK!..

İstedadlı jurnalist, ziyalı və dəyərli dostumuz Müşfiq Borçalının Azərbaycan Respublikasının Prezidenti cənab İlham Əliyevin Fərmanı ilə təsis edilmiş “Azərbaycan milli mətbuatının 150 illiyi (1875–2025)” Azərbaycan Respublikasının Yubiley medalı ilə təltif olunması - uzunillik, səmərəli və fədakar fəaliyyətinə verilən yüksək dövlət qiymətidir.

Müşfiq Borçalı xətrini istədiyim, qürur duyduğum dostlardandır. O, peşəsinə sədaqəti, sözə məsuliyyətli münasibəti, milli maraqlara söykənən mövqeyi ilə mətbuat cameəsində seçilən qələm sahiblərindəndir. Onun fəaliyyəti təkcə jurnalistika ilə məhdudlaşmır, həm də maarifçilik, ziyalılıq missiyası daşıyır. Bu baxımdan Prezident tərəfindən təltif olunması tamamilə qanunauyğun və ədalətlidir.

Müşfiq Borçalının formalaşmasında ailə mühitinin, xüsusilə də görkəmli dilçi-alim, tanınmış türkoloq, akademik Mədəd Çobanov kimi böyük bir ziyalının ocağında böyüməsinin xüsusi rolu var. Elmi düşüncə, milli təfəkkür, vətənə və xalqa xidmət ideyası Müşfiq Borçalının yaradıcılığında və həyat yolunda açıq şəkildə hiss olunur. O, atasının adını daim uca tutaraq bu irsi ləyaqətlə davam etdirir.

“Azərbaycan milli mətbuatının 150 illiyi” yubiley medalı Müşfiq Borçalının mətbuatımıza verdiyi töhfələrin, dürüst və prinsipial mövqeyinin, sözə vicdanla xidmətinin rəmzidir. Bu təltif həm də bütövlükdə Azərbaycan jurnalistikasına göstərilən dövlət qayğısının növbəti təzahürüdür.

Bu əlamətdar münasibətlə Müşfiq Borçalını ürəkdən təbrik edir, ona möhkəm cansağlığı, yeni yaradıcılıq uğurları, qələminin daim kəsərli, sözünün sanballı olmasını arzulayıram. İnanıram ki, o, bundan sonra da Azərbaycan mətbuatının inkişafı, milli-mənəvi dəyərlərimizin qorunması naminə fəaliyyətini eyni əzmlə davam etdirəcək.
Şərəfli yolun açıq olsun, əziz qardaş!..

ŞƏRAFƏDDİN İLKİN,
Şair-publisist,
Azərbaycan Yazıçılar Birliyinin üzvü,
Prezident təqaüdçüsü,
"Beynəlxalq Rəsul Rza mükafatı" laureatı.

ZiM.Az


.