Professor Asif Hacılının elmi layihəsi beynəlxalq müsabiqənin qalibi oldu

TƏBRİK EDİRİK!..

Azərbaycan Universitetinin Tərcümə və filologiya kafedrasının əməkdaşlarının “Ahıska türklərinin mədəni, dil və teatr irsinin tədqiqi və rəqəmsal arxivləşdirilməsi” (Research and Digital Archiving of the Culture, Language, and Theatre Heritage of Ahıska Turks) layihəsi Türk Akademiyası tərəfindən 2026-cı il üçün elan edilmiş beynəlxalq “Elmi layihələr müsabiqəsi”nin qalibi olub.
Layihənin məqsədi Ahıska türklərinin dil, mədəniyyət və teatr irsinin elmi əsaslarla araşdırılması, sistemləşdirilməsi və rəqəmsal arxiv formasında qorunmasıdır. Bu təşəbbüs Ahıska türklərinin zəngin mədəni irsinin gələcək nəsillərə ötürülməsi, elmi dövriyyəyə daxil edilməsi və beynəlxalq tədqiqatçılar üçün əlçatan edilməsi baxımından mühüm əhəmiyyət kəsb edir.

zim.az xəbər verir ki, layihənin rəhbəri Azərbaycan Universitetinin Tərcümə və filologiya kafedrasının professoru, uzun illər Ahıska türklərinin tarixi, mifoloji təsəvvürləri, etnoqrafiyası, folkloru, etnik mədəniyyətinin toplanması, tədqiqi və nəşri ilə məşğul olan, bu sahədə Azərbaycanda və Türkiyədə dərc olunmuş bir çox kitabların və məqalələrin müəllifi, filologiya elmləri doktoru Asif Hacılı, iştirakçıları isə Ahıska əsilli alim, Türkiyənin Bursa Uludağ Universitetinin professoru, Ahıska türk dili və folkloru üzrə mütəxəssis, Uluslararası Ahıska Araşdırmaları Dərgisinin redaktoru Minarə Əliyeva Çınar, Bakı Slavyan Universitetinin professoru, türkoloq Nizami Məmmədov, Azərbaycan Universitetinin Humanitar və sosial elmlər fakültəsinin dekanı, dosent Səfər Məmmədov, Tərcümə və filologiya kafedrasının müdiri, filologiya üzrə fəlsəfə doktoru Gülnar Rzayevadır.

Qeyd edək ki, Türk Akademiyası Türk Dövlətləri Təşkilatı çərçivəsində fəaliyyət göstərən beynəlxalq elmi qurum olaraq Türk dünyasında elmi inteqrasiyanın inkişafına, ortaq layihələrin həyata keçirilməsinə və mədəni irsin qorunmasınsa xidmət edən beynəkxalq elm mərkəzidir.

Biz də redaksiya heyətimiz adından dəyərli soydaşımız, görkəmli türkoloq, tanınmış ədəbiyyatşünas-alim və ictimai xadim, filologiya elmlər doktoru, çox hörmətli professor Asif Hacılını yeni nailiyyəti münasibətilə ürəkdən təbrik edir və ona yeni-yeni uğurlar arzulayırıq!..

Müşfiq BORÇALI,
ZiM.Az


.