Şəfa Əliyeva: “Gələcəyin alimi həm fundamental ənənəyə sadiq qalmalı, həm də texnoloji trendləri idarə etməyi bacarmalıdır”

Elm hər bir müasir cəmiyyətin davamlı inkişafının fundamentini təşkil edən əsas hərəkətverici qüvvədir, elmi tərəqqinin perspektivləri isə, ilk növbədə, gənc tədqiqatçıların intellektual əzmi, innovativ ruhu və milli dövlətçilik maraqlarına sadiqliyi ilə şərtlənir.

Bu sözləri AMEA-da “Elm günü” münasibətilə keçirilən tədbirdə AMEA-nın Gənclər Akademiyasının sədr müavini filologiya üzrə fəlsəfə doktoru Şəfa Əliyeva deyib.

Ölkəmizdə beynəlxalq elmi məkanda rəqabətə davamlı, peşəkar bir gənc alimlər nəslinin formalaşmaqda olduğunu bildirən sədr müavini gənc tədqiqatçıların qrant layihələrində iştirakının, həmçinin “Gənc alim” mükafatına təqdim olunan işlərin həm sayınım, həm də elmi səviyyəsinin əhəmiyyətli dərəcədə dərəcədə artdığını əlavə edib.

Şəfa Əliyeva dövlət dilinin qorunması sahəsində Gənclər Akademiyasının fəaliyyətindən söz açıb, 21 Fevral – Beynəlxalq Ana Dili Günü münasibətilə Akademiya tərəfindən ilk dəfə təşkil edilən Azərbaycan dili olimpiadasının əhəmiyyətini xüsusilə vurğulayıb. Həmçinin “Kiçik Akademiyalar” və ali təhsil müəssisələrinin tələbələri ilə səmərəli əməkdaşlıqdan, elmin populyarlaşdırılması istiqamətində görülən işlərdən bəhs edib.

“Gələcəyin alimi həm fundamental ənənəyə sadiq qalmalı, həm də texnoloji trendləri idarə etməyi bacarmalıdır. İnterdisiplinar yanaşma bizim ən güclü silahımız olmalıdır. Biz keçmişin təcrübəsi ilə gələcəyin innovasiyalarını birləşdirən strateji körpü rolunu oynayırıq”, - deyə sədr müavini bildirib.

Şəfa Əliyeva Gənclər Akademiyasının gələcək hədəflərinin beynəlxalq əməkdaşlığın genişləndirilməsi, elmi mühitdə şəffaflığın və etik prinsiplərin gücləndirilməsi, tədqiqatçılara dəstək mexanizmlərinin inkişafı və elmi nəticələrin praktik faydaya çevrilməsi istiqamətində fəaliyyətin gücləndirilməsi olduğunu qeyd edib.

ZiM.Az


.