ŞƏRƏFLİ ÖMÜR YOLU... FAİQ ŞAHBAZLI – 70

TƏBRİK EDİRİK!..

Bu gün Azərbaycanın Qabaqcıl təhsil işçisi, xalqımızın dəyərli ziyalısı, tanınmış dilçi-alim, filologiya üzrə fəlsəfə doktoru, Azərbaycan Dövlət Neft və Sənaye Universitetinin (ADNSU-nun) nəzdindəki Sənaye və Texnologiya Kollecinin direktoru, Əməkdar müəllim, çox hörmətli Faiq Şahbazlının 70-ci yaşı tamam olur.

Faiq Şaban oğlu Şahbazlı - 1955-ci il aprelin 25-də Dəvəçi (indiki Şabran) rayonunun Orta Əmirxanlı (indiki Vələsli) kəndində anadan olub. 1974-cü ildə Azərbaycan Dövlət Pedaqoji İnstitutunun (indiki Azərbaycan Dövlət Pedaqoji Universitetinin) filologiya fakültəsinə daxil olub. 1978-ci ildə həmin fakültəni fərqlənmə diplomu ilə başa vurub. Öz xahişi ilə Qubanın Xaltan kənd orta məktəbinə göndərilib. Bu məktəbdə müəllim, direktor müavini və direktor işləyib. 1981-ci ildə Bakıya köçüb, 83 nömrəli məktəbdə direktor müavini işləyib. Altı aydan sonra APİ-nin aspiranturasının əyani şöbəsinə daxil olub. 1986-cı ildə professor Afat Qurbanovun rəhbərliyi ilə “Azərbaycan dilçiliyinin inkişafında professor Ə.Dəmirçizadənin rolu” mövzusunda namizədlik dissertasiyasını müdafiə edərək filologiya elmləri namizədi alimlik dərəcəsini alıb. APİ-nin Azərbaycan dilçiliyi kafedrasında laborant, müəllim və dosent vəzifələrində işləyib. 1995-ci ildə Dəvəçi Rayon İcra Hakimiyyətində şöbə müdiri işləyib. Qısa müddətdən sonra yenidən APİ-yə qayıdıb. 1997-ci ildə Təhsil Nazirliyinin Elm İdarəsinin rəis müavini vəzifəsinə irəli çəkilib. Bir müddət burada işlədikdən sonra Dərslik və nəşriyyat şöbəsinə köçürülüb. 2006-cı ildən bu şöbənin müdiri vəzifəsində çalışıb. 2015-ci ildə Təhsil Problemləri İnstitutunun direktor müavini vəzifəsinə keçirilib.

Təhsil Naziri Ceyhun Bayramovun 21 may 2018-ci il tarixli əmri ilə Faiq Şaban oğlu Şahbazlı Bakı İdarəetmə və Texnologiya Kollecinə (BİTKol) direktor təyin olunub. Azərbaycan Respublikası Nazirlər Kabinetinin 10 iyul 2020-ci il 250 nömrəli qərarına əsasən, Bakı İdarəetmə və Texnologiya Kolleci ADNSU-nun nəzdində publik hüquqi şəxs statusuna malik olan Sənaye və Texnologiya Kollecinə çevrilmə yolu ilə yenidən təşkil edilib.

Uzun illər boyu həm müəllim, həm pedaqoq, həm alim, həm də təcrübəli təşkilatçı və bacarıqlı rəhbər kimi Azərbaycanın təhsil sisteminin inkişafına və müasirləşməsinə əhəmiyyətli töhfələr vermiş Faiq müəllim daim öz üzərində çalışır, təhsil sahəsindəki yenilikləri davamlı şəkildə rəhbərlik etdiyi təhsil müəssisəsinə tətbiq edir. Məhz bu yeniliklərin nəticəsidir ki, onun rəhbərlik etdiyi təhsil müəssisəsində təhsilin keyfiyyəti son illərdə daha da yüksəlmiş, müasir tədris metodları tətbiq olunmuş və tələbələrin təcrübə qazanmaq imkanları genişlənmişdir.
Eyni zamanda, kollecdə təşkil olunan bir çox elmi konfranslar, seminarlarla yanaşı, yenilikçi layihələrin və proqramların nəticəsində xeyli nailiyyətlər əldə olunmuşdur.

Xüsusilə qeyd edək ki, özünün dərin biliyi, təhsil sahəsindəki çoxillik təcrübəsi və zəngin fəaliyyəti ilə bir çox uğurlara imza atmış Faiq müəllim, Sənaye və Texnologiya Kollecinin tələbələrinə təkcə savad, bilik verməklə kifayətlənmir, həm də onların müsbət xarakter və dəyərlərlə yetişməsinə çalışır.
Elə buna görə də, Faiq müəllimin rəhbərliyi altında təhsil alan tələbələr yalnız elmi biliklərə deyil, həm də həyat təcrübəsinə və peşəkar bacarıqlara yiyələnməklə öz sahələrində uğurlar qazanırlar.

3 fənn proqramının, 5 orta məktəb dərsliyinin, 1 metodik vəsaitin, 70-dən artıq məqalənin müəllifi olan Faiq Şahbazlı həm də “Azərbaycanın təhsil siyasəti” ikicildliyinin tərtibçisidir, onlarca müxtəlif əsərlərə redaktorluq edib.
O, Azərbayvanda, Özbəkistanda və Türkiyədə keçirilmiş onlarla beynəlxalq elmi konfransın iştirakçısı olub, həmişə də onun məruzələri böyük maraqla qarşılanıb...



Azərbaycan təhsilinin parlaq simalarından olan Faiq Şahbazlı uzun illər boyu təhsil sahəsindəki əvəzsiz xidmətlərinə görə, Azərbaycanın qabaqcıl təhsil işçisi və Əməkdar müəllim fəxri adları ilə təltif olunmuşdur.

Faiq müəllim həm də Sənaye və Texnologiya Kollecində YAP ərazi partiya təşkilatının sədridir.

Elm və Təhsil Nazirliyi tərəfindən ADNSU-nun nəzdində Sənaye və Texnologiya Kollecinin direktoru Faiq Şahbazlı 70 illik yubileyi münasibətilə təhsil sahəsindəki uzunmüddətli və səmərəli fəaliyyəti, nailiyyətləri qiymətləndirilərək Fəxri Fərmanla təltif edilmişdir.
Fəxri Fərmanı 25 aprel 2025-ci ildə Elm və Ali Təhsil üzrə Dövlət Agentliyinin direktor müavini, Azərbaycan Milli Elmlər Akademiyasının müxbir üzvü, texnika elmləri doktoru, professor Əminağa Sadıqov yubilyara təqdim etmiş və ona gələcək fəaliyyətində uğurlar arzulamışdır.

Bəli, bu gün böyük əminliklə deyə bilərik ki, Faiq müəllimin 70 illik yubileyi, yalnız əvvəlki uğurlarının təhlili deyil, bu zəngin fəaliyyətin qiymətləndirilməsi və təhsil sahəsindəki böyük xidmətlərinin bir təntənəsidir.

Biz də redaksiya heyətimiz adından, xalqımızın dəyərli ziyalısı, çox hörmətli maarif xadimi, respublikamızın qabaqcıl təhsil işçisi, Sənaye və Texnologiya Kollecinin direktoru, Əməkdar müəllim, tanınmış dilçi-alim, filologiya üzrə fəlsəfə doktoru, dosent Faiq Şaban oğlu Şahbazlını anadan olmasının 70 illik yubileyi münasibətlə ürəkdən təbrik edir, ona uzun ömür, möhkəm cansağlığı, şərəfli elmi-pedaqoji və ictimai-siyasi fəaliyyətində yeni-yeni uğurlar arzulayırıq!..

Müşfiq BORÇALI,
Azərbaycan Texniki Universiteti
“Ziya” qəzetinin baş redaktoru,
AYB-nin və AJB-nin üzvü,
Filologiya üzrə fəlsəfə doktoru,
Prezident təqaüdçüsü,
"Abdulla Şaiq", "Nəriman Nərimanov",
"Qızıl qələm", Zirvə" və "Zəfər"
mükafatları laureatı

ZiM.Az


.