AMEA-da Ümummilli Liderə həsr edilmiş “Dahinin xatirəsinə” kitabının təqdimatı olub

2025-ci il Mayın 7-də AMEA-nın Mərkəzi Elmi Kitabxanasında tanınmış yazıçı-jurnalist, "İnformPress" qəzetinin baş redaktoru Gülnarə Tomris İsmayılzadənin Ümummilli Lider Heydər Əliyevə həsr edilmiş "Dahinin xatirəsinə" kitabının təqdimatı keçirilib.




Tədbirdə millət vəkilləri, görkəmli alimlər, məşhur akademiklər, tanınmış professorlar, elm, təhsil, ədəbiyyat, mədəniyyət və incəsənət xadimləri, ictimaiyyət nümayəndələri, jurnalistlər və digər qonaqlar iştirak ediblər.



Təqdimat mərasimini giriş nitqi ilə AMEA-nın Tarix və Etnologiya İnstitutunun şöbə müdiri akademik Nərgiz Axundova açaraq ictimaiyyətə təqdim olunan kitabın elmi əhəmiyyətini vurğulayıb.



Ulu Öndər Heydər Əliyevin Azərbaycan dövləti və xalqı qarşısındakı tarixi xidmətlərindən danışan akademik Nərgiz Axundova dahi liderin siyasi irsinin hər zaman elmi tədqiqatlar üçün zəngin mənbə olduğunu vurğulayıb. O, Ümummilli Liderin Azərbaycan tarixindəki əvəzsiz xidmətləri barədə faktların ictimaiyyətə çatdırılması istiqamətində təşəbbüslərin təqdirəlayiq olduğunu qeyd edib. Prezi-dent İlham Əliyevin Ümummilli Liderin ideyalarını müvəffəqiyyətlə həyata keçirdiyini və ölkəmizin öz ərazi bütövlüyünü, suverenliyini tam təmin etmiş güclü dövlət kimi yeni inkişaf mərhələsinə qədəm qoyduğunu diqqətə çatdırıb.



Akademik Nərgiz Axundova "Dahinin xatirəsinə" kitabı haqqında məlumat verərək qeyd edib ki, Azərbaycan dövlətinin müstəqillik əldə etməsindən sonra Ulu Öndərin ən mühüm məqsədlərindən biri hüquqi və sivil dövlət yaratmaq olub. Ümummilli Lider həyatının bütün məqamlarında atdığı hər bir addımda Azərbaycan xalqının rifahını, doğma Vətəninin maraqlarını düşünüb.
O, Ulu Öndər Heydər Əliyevin çoxşaxəli fəaliyyəti haqqında mühüm məqamların əks olunduğu kitabın milli yaddaş missiyasını həyata keçirdiyini söyləyib, müəllifi ərsəyə gətirdiyi əsər münasibətilə təbrik edib.



Akademik Nərgiz Axundova kitabın Ümummilli Lider Heydər Əliyev haqqında ortaya qoyulmuş nəşrlər arasında öz layiqli yerini tutacağına inamını ifadə edib.



Sonra tanınmış etnoqraf-tarixçi, tarix elmləri doktoru, professor Təvəkkül Səlimov çıxış edərək Ulu Öndər Heydər Əliyevlə bağlı xatirələrini bölüşüb, dahi liderin Azərbaycan xalqının yaddaşında müstəsna yeri olan dövlət xadimi kimi hər zaman yaşayacağını bildirib. Vurğulayıb ki, Ulu Öndərin milli maraqlara əsaslanan çoxşaxəli inkişaf strategiyası və siyasi kursu Azərbaycan Prezidenti İlham Əliyev tərəfindən uğurla davam etdirilir.



Professor Təvəkkül Səlimov ictimaiyyətə təqdim olunan kitab barədə təəssüratlarını bölüşərək qeyd edib ki, nəşrdə yer alan 123 nəfərin məqaləsində müasir Azərbaycanın qurucusu Heydər Əliyevin yorulmaz fəaliyyəti tarixi faktlarla oxucuya çatdırılır. Kitabda Ulu Öndərin dövlətçilik prinsipləri, onun müdrik siyasəti və xalqına olan sonsuz sevgisi müxtəlif rakurslardan əks olunub. O, uzun və gərgin əməyin məhsulu olan kitabın böyük tarixi əhəmiyyət kəsb etdiyini söyləyib, müəllifə yeni yara-dıcılıq uğurları arzulayıb.



Tədbirdə Milli Məclisin İctimai birliklər və dini qurumlar komitəsinin sədri Fazil Mustafa Ulu Öndər Heydər Əliyevin müstəqil dövlətçilik ənənələrindən söhbət açaraq bildirib ki, müasir Azərbaycan dövlətinin banisinin həyat yolu hər bir azərbaycanlı üçün əsl örnəkdir.

Fazil Mustafa nəşrdə Ümummilli Lider Heydər Əliyevin böyük irsi, dövlətçilik tariximizdə misilsiz xidmətləri, yüksək insani keyfiyyətləri və zəngin mənəvi dünyasının geniş şəkildə əks olunduğunu söyləyib.
Vurğulayıb ki, Heydər Əliyevə həsr olunan bu kitab, Ulu Öndərin şəxsiyyətinə böyük hörmətin və dərin ehtiramın ifadəsidir.
Nəşrdə dahi liderin həyatına və irsinə dair dəyərli fikirlər və xatirələr toplanıb.
O, bu nəşrin Ümummilli Liderin həyat və fəaliyyətini dərin insani keyfiyyətləri ilə birlikdə təqdim edən dəyərli əsər olduğunu deyib.



Daha sonra AMEA-nın Fəlsəfə və Sosiologiya İnstitutunun elmi işlər üzrə direktor müavini, tarix elmləri doktoru Eynulla Mədətli, AMEA-nın Tarix və Etnologiya İnstitutunun Əliyevşünaslıq şöbəsinin müdiri, tarix elmləri doktoru Ədalət Qasımov, Azərbaycan Tibb Universitetinin Epidemologiva ve biostatistika kafedrasının müdiri, tibb elmleri doktoru, professor İbadulla Ağayev, Azərbaycan Təhsil İnstitunun Psixoteriya laboratoriyasının müdiri. tibb elmləri doktoru, professor Yaşar İbadov, "Qələndər" klinikasının baş hekimi, professor, plastik və rekonstruktiv cərrah Vaqif Qələndər və başqaları çıxış edərək kitabın məziyyətlərindən danışıblar, Ulu Öndər Heydər Əliyevlə bağlı xatirələrini söyləyiblər.



Kitabın məsləhətçisi - Azərbaycan Texniki Universiteti “Ziya” qəzetinin baş redaktoru, AYB-nin və AJB-nin üzvü, Filologiya üzrə fəlsəfə doktoru, Prezident təqaüdçüsü, "Abdulla Şaiq", "Nəriman Nərimanov", "Qızıl qələm", Zirvə" və "Zəfər" mükafatları laureatı Müşfiq Borçalı çıxış edərək kitabın məziyyətlərindən danışıb, müəllifin Xalqımızın ümummilli lideri, Ulu Öndər və əbədiyaşar Heydər Əliyevin zəngin irsini dərindən araşdıraraq böyük zəhmət hesabına dəyərli bir əsər ərsəyə gətirdiyini diqqətə çatdırıb, kitabın işıqüzü görməsində və belə bir möhtəşəm təqdimat mərasiminin keçirilməsində əməyi olan hər kəsə təşəkkür edib və müəllifə yeni-yeni uğurlar arzulayıb.



Tədbir bədii hissə ilə davam etdirilib.




Azərbaycanın Xalq artisti Məleykə Əsədova, Əməkdar artist Ruhəngiz Allahverdiyeva, gənc şair-müğənni İslam Ələsgərli, Azərbaycan Yazıçılar və Azərbaycan Jurnalistlər Birliyinin üzvü Südabə Sərvi, şairə-jurnalist Rəsmiyyə Heybətağaqızı, həkim, şairə Sədaqət Rəşad, jurnalist, şairə-publisist Gülzar Şəmkirli və başqaları Ulu Öndərə həsr olunmuş şeirləri və nəğmləri ifa ediblər.



Sonda kitabın tərtibatçı-müəllifi yazıçı-jurnalist Gülnarə Tomris İsmayılzadə tədbirin təşkilatçılarına və iştirakçılarına minnətdarlığını bildirib.

Daha sonra xatirə üşün foto-şəkillər çəkilib.

Müşfiq BORÇALI,
ZiM.Az
.