Görkəmli ədəbiyyatşünas alim PƏRVANƏ xanım İSAYEVA vəfat edib

ALLAH RƏHMƏT ELƏSİN...

Dəyərli xanım ziyalılarımızdan olan, görkəmli ədəbiyyatşünas alim, AMEA-nın N.Gəncəvi adına Ədəbiyyat İnstitutunun baş elmi işçisi, filologiya elmləri doktoru, dosent PƏRVANƏ xanım İSAYEVAnın vaxtsız vəfatından kədərləndiyimizi bildirir, ailə üzvlərinə, doğmalarına, yaxınlarına, iş yoldaşlarına, həmkarlarına, bir sözlə, bütün PƏRVANƏSEVƏRLƏRə dərin hüznlə başsağlığı veririk.
Allah rəhmət eləsin!..

Qeyd edək ki, Pərvanə Bəkir qızı İsayeva 1969-cu il iyul ayının 12-də Bərdə şəhərində anadan olmuşdur. Əslən Laçın rayonunun Cağazur kəndindəndir.
Azərbaycan elmində misilsiz xidmətləri ilə yadda qalan Pərvanə xanım 2003-cü ildə “Azərbaycan ədəbiyyatşünaslığında faciə janrının tədqiqi problemləri” mövzusunda namizədlik, 2016-cı ildə “XX əsr Azərbaycan ədəbiyyatının bədii strukturu və mifopoetik təfəkkür (nəsr və dramaturgiya əsasında)” mövzusunda isə doktorluq dissertasiyalarını müdafiə etmişdir.
Müxtəlif illərdə ali təhsil müəssisələrində pedaqoji fəaliyyətlə məşğul olmuş, AR Prezidenti yanında Ali Attestasiya Komissiyasının Humanitar və ictimai elmlər şöbəsinin müdir müavini vəzifəsində çalışmış,
Ali Attestasiya Komissiyasının Ekspert şurası sədrinin müavini, N.Gəncəvi adına Ədəbiyyat İnstitutunda Dissertasiya Şurasının
üzvü və seminarın sədri olmuşdur.
Ailəli idi və bir övladı var.

Pərvanə İsayeva bir çox elmi monoqrafiya, kitab və məqalələrin müəllifidir. Onun “XX əsr Azərbaycan dramaturgiyasında İblis obrazının dini-mifoloji qaynaqlarına dair”, “Dastan poetikası və nəsr”, “Mifopoetika və filoloji fikirdə mif konsepsiyaları”, “Mifopoetika və XX əsr Azərbaycan ədəbiyyatının poetik strukturu”, “Faciə janrının poetikası və tədqiqi problemləri” adlı monoqrafiyaları və məqalələri bir çox yerli və xarici tədqiqatçıların istinad etdiyi mənbələr sırasında yer alır.
Pərvanə xanımın tədqiq etdiyi sahələrdən biri olan mifologiya elə bir istiqamətdir ki, orada xalqın ruhu, millilik, soy-kökə bağlılıq möhkəmdir. Bu sahədə araşdırma aparan tədqiqatçıda bu hisslər mütləq şəkildə ən yüksək səviyyədə özünü göstərməlidir.
Çünki bu sahənin araşdırmaçısı milli mənlik hissindən, soy-kökə bağlılıqdan uzaq olsa, uğurlu nəticələrə gəlib çıxa bilməz. Pərvanə xanım Bəkirqızı sözün əsl mənasında millətinə, dövlətinə, kökünə, adət-ənənəsinə, folkloruna, ədəbiyyatına, tarixinə bağlı bir alimdir.

Belə bir alimi vaxtsız itirdiyimiz üçün dərindən kədər hissi keçiririk.

Pərvanə xanımın elmi-nəzəri fikirləri, ideyalari hər zaman həmkarlarları, məsləkdaşları və yetirmələri tərəfindən davam etdiriləcək.
Bir sözlə, Pərvanə xanımın əziz xatirəsi onu tanıyanların qəlbində daim və əbədi olaraq yaşayacaq...
Allah rəhmət eləsin!..
Ruhu şad, Məkanı cənnət olsun!..

Müşfiq BORÇALI,
ZiM.Az


.